សម្រាប់បុរស

សម្រាប់ស្ត្រីនិងគ្រួសារ

សម្រាប់ស្ត្រីនៅលីវ

ទំនួលខុសត្រូវសម្រាប់ការពន្យារកំណើតនិងការរៀបចំផែនការគ្រួសារប្រកបដោយប្រសិទ្ធភាពគឺជាការចែករំលែកស្មើភាពគ្នារវាងបុរសនិងស្ត្រី។ការប្រើប្រាស់មធ្យោបាយពន្យារកំណើតដូចជាការប្រើស្រោមអនាម័យនិង មធ្យោបាយពន្យារកំណើតរយៈពេលខ្លីនិងរយៈពេលយូរដ៏ទៃទៀត អាចកាត់បន្ថយអត្រានៃការឆ្លងជំងឺកាមរោគបានយ៉ាងច្រើន។ ការត្រួតពិនិត្យសុខភាពជាប្រចាំអាចបង្ការការកើតជំងឺធ្ងន់ធ្ងរបាន។ អង្គការម៉ារីស្តូបផ្តល់សេវាពិនិត្យសុខភាពដែលរក្សាការសម្ងាត់និងប្រកបដោយគុណភាព សម្រាប់បុរសទាំងអស់មិនថាអ្នករៀបការរួចអ្នកមិនទាន់រៀបការអ្នកមានកូនហើយឬអ្នកមិនទាន់មានកូន។

មធ្យោបាយពន្យារកំណើត
ពិនិត្យព្យាបាលជំងឺកាមរោគ
ការរួមភេទដោយសុវត្ថិភាព
ផ្តល់សេវាគាំទ្រដៃគូឬភរិយារបស់អ្នក

ស្រោមអនាម័យ

ស្រោមអនាម័យត្រូវបានផលិតឡើងពីសារធាតុកៅស៊ូស្វិតមានសភាពស្តើង វាត្រូវបានគេប្រើដោយពាក់ទៅលើប្រដាប់ភេទបុរសដើម្បីការពារមេជីវិតឈ្មោលមិនឱ្យហូរចូលទៅកាន់ទ្វារមាស។

របៀបប្រើ
- ពាក់ស្រោមអនាម័យថ្មីទៅលើប្រដាប់ភេទបុរសដែលកំពុងតែឡើងរឹងមុនពេលរួមភេទម្តងៗ។
- ចោលស្រមអនាម័យដែលប្រើរួចឱ្យបានត្រឹមត្រូវ
អ្វីដែលនឹងកើតឡើង
- មិនប៉ះពាល់ណាមួយឡើយ។
ចំណុចគួរចងចាំ
- នេះជាមធ្យោបាយតែមួយគត់ដែលអាចពន្យារកំណើតនិងការពារមិនឱ្យមានផ្ទៃពោះរួមទាំងការពារពីការឆ្លងជំងឺកាមរោគអេដស៍ផងដែរ។
- មានលក់នៅឱសថស្ថាននិងតាមហាងលក់ទំនិញតូចៗជាច្រើនកន្លែង។
- ប្រើបានតែម្តងគត់សម្រាប់ការរួមភេទម្តង ។
- មានប្រសិទ្ធភាពខ្ពស់ប្រសិនប្រើត្រូវតាមការណែនាំ។
- ត្រូវរក្សាស្រោមអនាម័យឱ្យមាននៅផ្ទះជានិច្ចជៀសវាងកុំឱ្យអស់
- ពិនិត្យកាលបរិច្ឆេទដើម្បីធានាថាស្រោមអនាម័យមិនហួសកំណត់។ ស្រោមអនាម័យដែលហួសកំណត់គឺមានប្រសិទ្ធភាពតិចតួច។

ការចងបំពង់បង្ហូរមេជីវិតឈ្មោល

នេះជាមធ្យោបាយពន្យារកំណើតមួយដែលមានសុវត្ថិភាពនិងអចិន្ត្រៃយ៍ សម្រាប់បុរសដែលមានកូនគ្រប់គ្រាន់និងសម្រេចចិត្តមិនយកកូនទៀត។

វិធីសាស្រ្ត
- គ្រូពេទ្យឯកទេសនឹងចោះរន្ធតូចៗចំនួនពីរលើពងស្វាសដើម្បីចូលទៅដល់បំពង់បង្ហូរមេជីវិតឈ្មោល។
- គ្រាន់តែកាត់បំពង់បង្ហូរមេជីវិតឈ្មោលប៉ុណ្ណោះប៉ុន្តែពងស្វាសមិនត្រូវវះកាត់យកចេញនោះទេ។
- នេះជាដំណើរការដែលរារាំងមេជីវិតឈ្មោលមិនឱ្យចូលក្នុងទឹកកាម។
ដំណើរការ?
- វាអាចមានប្រសិទ្ធភាពចាប់ពី៣ខែក្រោយពេលដែលកាត់បំពង់មេជីវិតរួច។ ដូច្នេះសូមប្រើប្រាស់មធ្យោបាយពន្យារកំណើតមួយផ្សេងទៀតដើម្បីពន្យារកំណើតក្នុងកំឡុងពេល៣ខែបន្ទាប់ពីកាត់បំពង់បង្ហូរមេជីវិតនេះរួច។
- ក្រោយរយៈពេល៣ខែអ្នកមិនចាំបាច់ប្រើប្រាស់មធ្យោបាយណាទៀតទេ។
អ្វីដែលនឹងកើតឡើង
- មិនចាំបាច់ប្រើថ្នាំសណ្តំនៅពេលវះកាត់។
- ជាទូទៅប្រហែល២ទៅ៣ម៉ោងបន្ទាប់ពីវះកាត់រួចអ្នកអាចត្រលប់ទៅផ្ទះវិញ។
- អាចមានស្នាមជាំនិងការឈឺចាប់ខ្លះៗក្នុងរយៈពេល២ទៅ៣ថ្ងៃបន្ទាប់ពីវះកាត់រួច។
ចំណុចគួរចងចាំ
- មិនកាត់បន្ថយចំណង់ផ្លូវភេទ ការឡើងរឹងនៃប្រដាប់ភេទឫការចេញទឹកកាម។
- គ្មានផលប៉ះពាល់ចំពោះសុខភាពមិនធ្វើឱ្យសុខភាពអ្នកចុះខ្សោយ។
- បុរសមានទំនួលខុសត្រូវក្នុងការពន្យារកំណើតមានន័យថាអ្នកបានសម្រាលបន្ទុកភរិយា។
- នេះជាមធ្យោបាយពន្យារកំណើតអចិន្ត្រៃយ៍ ដូច្នេះសូមអ្នកនិងដៃគូត្រូវពិភាក្សានិងព្រមព្រៀងគ្នាជាមុនសិន។
- ប្រើប្រាស់ស្រោមអនាម័យប្រសិនបើអ្នកចង់ការពារពីការឆ្លងជំងឺកាមរោគអេដស៍។

ពិនិត្យនិងព្យាបាលជំងឺកាមរោគ ដូចជាមេរោគអេដស៍ដែរ

មេរោគកាមរោគអាចការពារបានតាមរយៈការប្រើប្រាស់ស្រោមអនាម័យ។ មេរោគកាមរោគដែលស្ថិតក្នុងខ្លួនបុរសងាយស្រួលរកឃើញជាងក្នុងខ្លួនស្ត្រី ដោយសារបុរសឆាប់បង្ហាញចេញនូវរោគសញ្ញានៃជំងឺកាមរោគលឿនជាងស្ត្រី។

យើងខ្ញុំសូមផ្តល់យោបល់ឱ្យយុវជនទៅធ្វើការពិនិត្យរកជំងឺកាមរោគរួមទាំងមេរោគអេដស៍ផងដែរ។

យើងផ្តល់ការធ្វើតេស្តឈាមរកមេរោគអេដស៍និងការព្យាបាលជំងឺកាមរោគរួមមានដូចជា៖

ជំងឺក្លាមេឌីយ៉ា

ជំងឺសិរមាន់

ជំងឺប្រមេះទឹកបាយ

ជំងឺរើមកើតលើប្រដាប់ភេទ

កមរមាស់(បណ្តាលពីចៃលើប្រដាប់ភេទ)

ជំងឺស្វាយ

សុវត្ថិភាពក្នុងការរួមភេទ

តើអ្វីជាសុវត្ថិភាពក្នុងការរួមភេទ?

សុវត្ថិភាពក្នុងការរួមភេទមានន័យថាជាការថែរក្សាសុខភាពផ្លូវកាយនិងផ្លូវអារម្មណ៍របស់អ្នក។ អ្នកនិងដៃគូរបស់អ្នកចាំបាច់សម្រេចចិត្តឱ្យបានត្រឹមត្រូវក្នុងការរួមភេទ និងយល់ដឹងពីវិធីសាស្រ្តក្នុងការរួមភេទឱ្យមានសុវត្ថិភាពតាមដែលអាចធ្វើបានពោលគឺចាប់ពីពេលដែលអ្នករួមភេទជាលើកដំបូង។

ប្រសិនបើអ្នកនៅមានកង្វល់ចំពោះការសម្រេចចិត្តរួមភេទរបស់អ្នក នោះមានន័យថាអ្នកប្រហែលមិនទាន់ត្រៀមខ្លួនរួចនៅឡើយ។

សុវត្ថិភាពក្នុងការរួមភេទមានន័យថា៖
- ជាការរួមភេទណាមួយដែលអ្នកចង់ប្រព្រឹត្ត-ការមិនដាក់សម្ពាធឬបង្ខំក្នុងការធ្វើអ្វីមួយដែលអ្នកមិនចង់ធ្វើ។
- ជាការរួមភេទដែលអ្នកបានត្រៀមអារម្មណ៍រួចរាល់ហើយ
- ជាការរួមភេទមួយបែបដែលជៀសវាងការឆ្លងឫចំលងជំងឺកាមរោគ
- ជាការរួមភេទដែលនឹងមិនបណ្តាលឱ្យមានផ្ទៃពោះឬធ្វើឲ្យនរណាម្នាក់មានផ្ទៃពោះលុះត្រាណាតែអ្នកចង់បាន។

ការរួមភេទដោយប្រថុយឬធ្វើការសម្រេចចិត្តមួយដោយផ្អែកលើព័ត៌មានខុស អាចនាំទៅរកស្ថានភាពដែលប្រហែលជាអាចធ្វើឱ្យជីវិតរបស់អ្នកមានការប្រែប្រួល។ មធ្យោបាយតែមួយគត់ដែលអាចជួយអ្នកមិនឱ្យមានផ្ទៃពោះនោះគឺការមិនរួមភេទ ប៉ុន្តែប្រសិនបើអ្នកសម្រេចចិត្តរួមភេទនោះសូមអ្នកប្រព្រឹត្តវាដោយសុវត្ថិភាពតាមដែលអាចធ្វើបាន។ ទាំងនេះមានន័យថាអ្នកបាននិងកំពុងការពារពីការមានផ្ទៃពោះនៅពេលអ្នកមិនចង់បានឬអ្នកបានការពារពីជំងឺកាមរោគ។

តើអ្នកធ្វើដូចម្តេចដើម្បីរួមភេទឱ្យកាន់តែមានសុវត្ថិភាព?
- ការព្រមព្រៀងគ្នា – ដៃគូទាំងសងខាងត្រូវតែព្រមព្រៀងគ្នាដោយយល់ដឹងទូលំទូលាយពីការរួមភេទ។ ការព្រមព្រៀងគ្នាម្តងមិនមែនមានន័យថាជាការព្រមព្រៀងគ្រប់បែបយ៉ាងនិងគ្រប់ពេលនោះឡើយ។
- ការពន្យារកំណើត – ការពន្យារកំណើតជាមធ្យោបាយបង្ការកុំឱ្យមានផ្ទៃពោះ។ នៅពេលដែលអ្នកទៅជួបជាមួយអ្នកផ្តល់ប្រឹក្សាផ្នែកសុខភាព អំពីការពន្យារកំណើតពួកគេនឹងសួរអ្នកនូវសំណួរអំពីសុខភាពអ្នកនិងគ្រួសារអ្នកដូច្នេះពួកគេនឹងដឹងថាតើការពន្យារកំណើតមួយណាដែលផ្តល់សុវត្ថិភាពបំផុតសម្រាប់អ្នក។
- ស្រោមអនាម័យ – ស្រោមអនាម័យ គឺជាមធ្យោបាយមួយសម្រាប់ការពន្យារកំណើតនិងជួយមិនឱ្យឆ្លងជំងឺកាមរោគទៀតផង។ ស្រោមអនាម័យងាយស្រួលក្នុងការស្វែងរកងាយស្រួលក្នុងការប្រើ និងគ្មានផលប៉ះពាល់ក្រោយពេលប្រើរួច។
- ការពិនិត្យសុខភាព – ទៅពិនិត្យសុខភាពបន្តពូជឱ្យបានទៀងទាត់ ព្រោះវាមានសារៈសំខាន់សម្រាប់អ្នកដែលមានការរួមភេទញឹកញាប់ ព្រោះមានជំងឺកាមរោគច្រើនប្រភេទមិនមានចេញរោគសញ្ញាឡើយ ដូច្នេះអ្នកមិនអាចដឹងបានទេថាអ្នកឬដៃគូរបស់អ្នកបានឆ្លងមេរោគទាំងនេះ។

គាំទ្រដល់ដៃគូឬភរិយារបស់អ្នក

តើអ្វីជាការគាំទ្រ?

ការស្រលាញ់និងថែទាំចំពោះដៃគូរបស់អ្នកគឺជារឿងសំខាន់ ហើយការគាំទ្រគឺជាការលើកទឹកចិត្តនិងស្មោះស័្មគ្រមរស់ជាមួយដៃគូរបស់អ្នក។

តើអ្នកគាំទ្រដៃគូរបស់អ្នកដោយរបៀបណា?

អ្នកត្រូវតែយល់ដឹងពីដៃគូរបស់អ្នក គួរយល់ថាអារម្មណ៍និងអ័រម៉ូនអាចបណ្តាលឱ្យអត្តចរិតផ្ទាល់ខ្លួនរបស់មនុស្សប្រែប្រួល។ ភាពអត់ធ្មត់និងការផ្តល់ការគាំទ្រតាមវិធីមួយល្អបំផុតតាមដែលអ្នកអាចធ្វើទៅបាន។

ហេតុអ្វីបានជាការគាំទ្រមានសារសំខាន់?

នៅពេលដែលមានភាពតានតឹងខ្លាំង ការគាំទ្រដល់ដៃគូរបស់អ្នកគឺជាមធ្យោបាយល្អបំផុតដើម្បីឆ្លងឱ្យផុតនូវពេលវេលាដែលលំបាកបែបនេះ។ តាមរយៈការគាំទ្រស្តែងឱ្យឃើញថាសកម្មភាពនិង ឥរិយាបថរបស់អ្នកនឹងបង្ហាញថាអ្នកជឿទុកចិត្តលើដៃគូ។